يالساكن بنبع الهدب
وتسوچب بدمعي غصب
مانغزتك أرويحتك حتى تحن
كحلة وأناغم مقلتك
خرزة حسد وبرگبتك
دمعة محب بطارف جفن
زندوك تهيج لوعتي
لوحة رسم ولدنيتي
متغاوي لابس نص ردن
گلبي نوارس البحر
تنشد الـك تتغزلك
وي هفهفة شراع السفن
يأاحلى من كل الحلى
وردة ربيع مجمبده
تتمايل بأعلى الغصن
صوتك تغاريد الصبح
موسيقى حب مجلجله
نوتة نغم بأجمل لحن
تاخذني وبنشوة عشگ
وما انتبه الا على أنفاسك
وهمسة شـفافك للاذن
خليني اغرگ بالعشگ
مزگ شرايين الگلب
وأطحنهن ابهجرك طحن
شوگك مثل نزف وجرح
وترشه برذاذ الملح
أتگلب وكل ليلي أأئن
وهمسك ترانيم الفجر
تفطرلّي اگليبي فطر
ناي و ترددها بحزن
يلي صفاتك من العرب
فنجان گهوة مهيله
مرطعمه يغري من يرن
أمنادمك فرحة عمر
شموع وتنور كالگمر
بحندس ليالي من تجن
حلفتك بكل لحظة زمن
تتذكر أيام المـضن
لوناسي ترجع,, بس مأظن
وأوردة روحي بالهوى
تنزف ومامش كل دوا
مكتوب الي راح ابگى أون
راح ابگى أون
|
|
ليست هناك تعليقات:
إرسال تعليق