ابوذيات الكاظمي
شما امنع وانهي الگلب منها
عنك يالصرت للروح منها
باب اللي تجيلك ريح منها
سدها واستريح من الاذيه
سرح گـلبي برياض الشوگ وهوه
رگــــه ذروة رواسي العشـگ وهوه
طبيب اصبح يداوي الناس وهوه
عليل ولا دوه لعلته الخفيه
يزاهد ظني تطهر من سبحتك
بح بالدجل صوتك من سبحتك
خمرتي عندي اطهر من سبحتك
بسبحتك چـم وچـم خمرة خفيه
العسر لمن يمر بعداه يسره
اخذ يمنه الطريج وعوف يسره
هذا العمر شبه الطيف يسره
ساعه ويندهك چـف المنيه
چـف الموت عالوادم تراها
تراها لحظه ويزورك تراها
بطن الارض لونك تراها
مملوك وملك ناموا سويه
العواذل يمنه ماتدنه ولاتنام
اگـطعت بالصبر بذرتهم ولا تنام
العمر خلصان گـوم اسهر ولا تنام
الك نومه طويله ابهالوطيه
ابنفسي أگـصدت دارك والسعتني
ونـگـلتني أجدامي والسعتني
شلت بيدي العجارب والسعتني
حيل وياي كل هاي من ايديه
ليست هناك تعليقات:
إرسال تعليق