گـالولي اوگف جبيل اللي يوده شگـف
شگـف
گـالولي اوگف جبيل اللي يوده شگـف
بسهام لحظه رماني وادعه گلبي شگـف
شاگفت رميات عينه ومالحگلي شگف
وظليت اخافچ وارافس كالذبيح وذاك
وجمر العواذل حدر ضلعي يشبو ذاك
طاوس چـني وطحت مابين هذا وذاك
واحد يطگني بحجر واحد يذبلي شگف
مهل
هلت اهلالات سعدك بس هلالي مهل
هلت ذراري الجفه وذاري التصافي مهل
هلت الناس ونطت بسمك وعود ومهل
مهل لـجل شوفتك يالشـوفتك هـلت
مهل علي ابوصولك يالگـلت هلت
مهل مثل مدمعي وعيوني دم هلت
هلت لاجل شوفتك ياللذي دمعك مهل
ينراف
يايوم بيرغ وصالك للمحب ينراف
وگلبك الجاسي علي عگب الجفه ينراف
ماتدري للموت جفني بغيبتك ينراف
وابأم عيني صعد من نار هجرك سنه
ياسبب چـفك لعد سيف التجافي سنه
جرح العدو ايطيب عالاكثر يطول سنه
لاجنه جرح الصديج ابيا دوه ينراف
چـفه
هيهات يحصل شبيهك للعزم چـفه
يامنبع الجود يابــحر الــكرم چـفه
عگـبك اواني الهنه الها الدهر چـفه
والسهر اصبح نصيبي والنواظر محن
مارحم بيه الوكت حكم الليالي محن
اشما يحمل اهموم گلبي اشما يكابد محن
كلهن بچفه وفرگــتك مية الف چـفه
مرات
مرة اروح ابشغف لارض العشگ مرات
وردود اجد بالزمل وانده انا مرات
يرجع صداي وترد ويا غصص مرات
چـنهن هلاهل مزهرات ابذنب مرة
چـم سهم گوسك على گلب المحب مرة
يالگلت اذكر حبيبك بالسنه مرة
بكل لحظه طيفك يمر بيه عشر مرات
أنسه
اي والاله الحجب جنه وظهر أنسه
طرواك أصبح على لسان المحب أنسه
لتلوم سكران بغتوت الهجر أنسه
وأنه السكرت ابهواك اشلون اصاحبه
داهمني سل الهوى وهيهات اصاحبه
مو آنه ذاك اللگــه احبابه نسه صاحبه
لو الف عام ابتعد عنك فلا أنسه
كل الابيات للشاعر جابر الكاظمي
ليست هناك تعليقات:
إرسال تعليق